09:42 07 сентября 2015 г.
Сентябрĕн 5-мĕшĕнче Шупашкар хулинче тăван халăхăмăрăн мухтавлă ывăлне - Совет Союзĕн икĕ хут Геройне, авиаци генерал-майорне Андриян Григорьевич Николаева халалласа "Советская Чувашия" хаçатăн парнисене çĕнсе илессишĕн спорт ăмăртăвĕ иртрĕ.
"Олимпийский" стадиона пухăннă спортсменсене чи малтанах Чăваш Республикин Пуçлăхĕн тивĕçĕсене вăхăтлăх пурнăçлаканĕ Михаил Игнатьев саламларĕ. - Спорт пурне те пĕрлештерет, вăй-хала çирĕплетет, çĕнĕ туйăмсем парнелет. Ахальтен мар Чăваш Ен патшалăх политикин тĕп çул-йĕрĕсенчен пĕри - спорт çине тимлĕх уйăрасси, сывă пурнăç йĕркине тытса пыма халăха ытларах та ытларах явăçтарасси. Çавна май республикăра çĕнĕ спорт объекчĕсем хута каяççĕ, тĕрлĕ спорт ăмăртăвĕсем, акцисем тăтăшах иртеççĕ. Эпĕ паян кунта килнисене пурне те тав тăватăп. Эсир ыттисемшĕн тĕслĕх вырăнĕнче. Спорта юратар, унпа туслашар, - палăртрĕ вăл.
Чи малтан VIP-чупăва ертỹçĕсем - Чăваш Республикин Пуçлăхĕн тивĕçĕсене вăхăтлăх пурнăçлакан Михаил Игнатьев, ЧР Патшалăх Канашĕн депутачĕсем, ĕç тăвакан влаç органĕсенче тăрăшакансем, вырăнти хăй тытăмлăх органĕсенче вăй хуракансем тата ытти официаллă хăнасем - тухрĕç. Ăмăртăва чăннипех те спорта юратакансем килсе çитни куç кĕрет. Районсемпе хуласенче тухса тăракан хаçат-журнал ĕçченĕсем, радио-телевидени журналисчĕсем старта тухрĕç. Министерствăсемпе тĕрлĕ ведомствăсен ĕçченĕсем, аслă вĕренỹ заведенийĕсен студенчĕсем, шкул ачисем тĕрлĕ дистанцисене чупса тупăшрĕç. Çумăр пĕр чарăнмасăр çуни те спортсменсене старта тухма, çĕнтерỹ патне ăнтăлма чăрмантармарĕ. Эпир те, "Каçал ен" хаçат ĕçченĕсем, спорт фестивальне хутшăнтăмăр, район администрацийĕн туслă команди те ăмăртăва хастар хутшăнчĕ. Ççĕнтерỹçĕсен йышне лекеймерĕмĕр пулин те, ăмăртуран хаваслă кăмăлпа таврăнтăмăр.
А.Антонова.
Автономное учреждение Чувашской Республики «Редакция Комсомольской районной газеты «Касал ен» («Кошелеевский край») Министерства информационной политики и массовых коммуникаций Чувашской Республики