16:48 24 апреля 2015 г.
"Чăвашпотребсоюз" Раççей Федерацийĕнчи çак йышши тытăмсем хушшинчи рейтингра иккĕмĕш вырăнта пырать, çавăнпа та ытти регионсенчен чăваш кооператорĕсен ĕçĕпе паллашма час-час килнинчен тĕлĕнмелле те мар пуль. Акă, иртнĕ кунсенче те Чăваш Ене Орел облпотребсоюзĕн делегацийĕ ĕçлĕ визитпа çитрĕ. Облпотребсоюз совечĕн председателĕ Виктор Найденов ертсе пыракан ушкăн вара паха опыт çинчен пĕлме пирĕн тăрăха çул тытнă. Çакă та ăнсăртран мар ĕнтĕ, мĕншĕн тесен Комсомольски райповĕ - республикăра малта пыракансен йышĕнче.
Комсомольски райпо совечĕн председателĕпе Евгений Карпеевпа Мансур Ямалиев директор хăнасене "Кооператор" производство комбинатĕнче кĕтсе илчĕç. Вĕсене минераллă шывсемпе алкогольсĕр шĕвексем кăларакан производство ытларах кăсăклантарнăран, паллашăва та шăп çав цехсенчен пуçларĕç. Каçалсен пылак тата минераллă шывĕсене тутанса пысăк хак пачĕç хăнасем, çакнашкал цеха уçас ĕçе мĕнрен пуçăнмалли таранчченех ыйтса пĕлчĕç.
Çăкăр заводĕнче те, Комсомольски райповĕн производство цехĕнче те, "Гастроном" тата "Суту-илỹ çурчĕ" лавккасенче те пирĕн кооператорсем Орелтан килнĕ ĕçтешĕсене хăйсен ĕç вăрттăнлăхĕсемпе кăмăлтанах паллаштарчĕç, ăшă калаçура вĕсен опычĕ çинчен те ыйтса пĕлчĕç. Облпотребсоюз совечĕн председателĕ Виктор Найденов магазинсене автоматизацилени таварçаврăнăшне сăнаса тăма тата унăн вăхăтне кĕскетме пулăшнине палăртрĕ, çак меслет çине куçма сĕнчĕ.
Ĕçлĕ çак тĕлпулу икĕ енĕшĕн те питĕ усăллине, туслă çыхăнăва малашне тата çирĕплетмеллине палăртрĕç. Хăнасем Орел облпотребсоюзне çитсе курма та йыхравларĕç. "Ĕмĕр пурăн - ĕмĕр вĕрен", тенĕ ваттисем, ытти регионти ĕçтешсен меслечĕсемпе паллашни-курни чăваш кооператорĕсене те кирлех, çапла пултăр та.
Автономное учреждение Чувашской Республики «Редакция Комсомольской районной газеты «Касал ен» («Кошелеевский край») Министерства информационной политики и массовых коммуникаций Чувашской Республики