14:16 25 ноября 2014 г.
Чăваш хĕрарăмĕ мĕн ĕлĕкрен алă ĕçĕ тума ăста пулнă. Пир тĕртме те, çăм арлама та, кĕпе-саппун, тутăр çĕлеме те, тĕрлеме те, çыхма та вăхăт тупнă. Халĕ те çак йăлана чунтан юратакансем пур. Маттур хĕрарăмсем пушă вăхăт тупăнсанах тĕрлеме, чĕнтĕр çыхма, тĕрлĕ япаласем ăсталама лараççĕ. Вĕсен ĕçĕсем чăннипех те илемлĕ пулса тухаççĕ. Пĕр-пĕрин паха япалисемпе паллашма, вĕренме час-часах тĕрлĕ выставкăсем йĕркелени пысăк витĕм кỹрет. Сăмахран, кашни çулах районти Акатуйра, "Çĕр тата çынсем" халăх музейĕнче, библиотекăсенче алă ĕçĕсен куравне йĕркеленин паха енĕсем сахал мар.
Районта пурăнакансем алă ĕçĕсемпе паллашма, вĕсене хак пама яланах хавас. Анчах та кашниех выставкăна çитсе курма вăхăт тупаймасть çав. Çавна май, çынсем ыттисен ĕçĕсене хаклама пултарччăр тесе, "Çĕр тата çынсем" халăх музейĕн ĕçченĕ Алена Полякова автомашина салонне тĕрлĕ ĕçсемпе илемлетме шутланă. Çак шухăш пурнăçа кĕнех. Район центрĕнчен тĕп больницăна, ялсене çỹрекен, пассажирсене турттаракан "ГАЗеле" шăпах алă ĕçĕсемпе илемлетнĕ. - Çитес вырсарни кун Амăшĕсен кунне уявланă май, "Пирĕн аннесен маттур аллисем" выставкăна автомашина салонĕнче йĕркелерĕмĕр. Çакна ахальтен мар, кашни çын вĕсен ĕçне хак пама пултартăр, паллаштăр тесе пурнăçланă, - пĕлтерчĕ Алена Овиковна.
Вырăна çитсе курсан хам та тĕлĕнтĕм. "ГАЗель" салонĕнче тĕрлĕ чĕнтĕрлĕ салфеткăсем, тĕрленĕ ал тутрисем, çыхнă тĕрлĕ тĕслĕ чечексем пур. Татьяна Ишмуратова (Хырай Ĕнел), Ираида Макарова (Аслă Чурачăк), Елена Жукова (Комсомольски), Зоя Дмитриева (Таманла Высли) ĕçĕсем салона илемлетеççĕ. Ĕненместĕр-и, çитсе курăр! "ГАЗель" номерĕ - Е477МУ. - Чăн малтанах автомашинăра выставка йĕркелеме ыйтни кĕтменлĕх пулчĕ. Район çыннисем мĕнле хаклĕç-ши терĕм. Киров поселокне çула тухнă пассажирсем, больницăна ларса каçакансем çак илеме курсан тĕлĕнĕвне пытармарĕç, çав тери кăмăллă вĕсем. Эх! Епле илемлĕ, кунтан тухас та килмест теççĕ, - пĕлтерчĕ Владимир Волков предприниматель.
Автономное учреждение Чувашской Республики «Редакция Комсомольской районной газеты «Касал ен» («Кошелеевский край») Министерства информационной политики и массовых коммуникаций Чувашской Республики