09:11 23 июня 2014 г.
Тĕп хулапа пĕрле Республика кунне кăçал Комсомольски районĕ те йышăнĕ. Çак чыса районăмăр 2013 çулта ятарлă конкурса хутшăнса çĕнсе илчĕ. Çĕнĕ çул умĕнех хатĕрленỹ ĕçĕсем пуçланчĕç. Вăхăт сисĕнмесĕр иртет. Унтанпа уява йĕркелесе ирттерес тĕлĕшпе эпир, Каçал енре пурăнакансем, чылай ĕç турăмăр. Районăн тата ял поселенийĕсен гербĕсемпе ялавĕсене, гимнĕсене йышăннă, райцентр сăн-сăпатне тирпейлесе илемлетнĕ, çулсемпе тротуарсем сарнă, çĕнĕ объектсем çĕкленĕ тата ытти те. Пысăк та сумлă уяв - Республика кунĕ - пирĕн районта çитес ытлари кун пулать. Район администрацийĕн пуçлăхĕпе Михаил Афанасьевпа тĕп уява хатĕрленсе мĕн-мĕн тунипе, Республика кунĕнче район çыннисем мĕнле культура мероприятийĕсене çитсе курма пултарни пирки калаçрăмăр.
- Михаил Романович, çуркуннеренпе район центрĕ питĕ нумай улшăнчĕ, илемленчĕ, çĕнелчĕ. Çак енĕпе тăрăшса ĕçленисенчен Сирĕн уйрăмах камсене палăртас килет?
- Чăнах та, райцентрта ỹсекен хитре чечексем кăмăла çĕклеççĕ, тирпейлĕх тỹрех куçа курăнать. Çак ĕçре район администрацийĕнче, предприятисемпе организацисенче, учрежденисенче тăрăшакансен кашнин тỹпиех пысăк. Пурте хăйсене шанса панă çĕрте пысăк яваплăха туйса ĕçлерĕç. Унсăр пуçне, çулсем, тротуарсем саракансем, хăтлăх кĕртекенсем те чылайăн. "Комсомольскинчи РСУ" АХО, "Стройсервис" ТМЯО, коммуналлă хуçалăх рабочийĕсем хастар ĕçлерĕç. Хамăр ентеш М.М.Шарафутдинов ертсе пыракан Шупашкарти "Арка" фирма вара ача-пăча сценине тăвассине те, тăкакĕсене те хăй çине илчĕ. "Кĕтне" ентешлĕх ниме мелĕпе укçа пуçтарса Комсомольскине кĕнĕ çĕре стелла лартрĕ. "БиЛайн" çыхăну операторĕ те пысăк пулăшу пачĕ. Пĕр мероприятие те укçа-тенкĕсĕр йĕркелеме май çук. Акă, çак ĕçе районти мĕнпур организаци ĕçченĕсем хутшăнчĕç. Уяв пухмачне 100-шер пин тенкĕ панă уйрăм çынсем те пур, вĕсене эпир июнĕн 24-мĕшĕнче чыслăпăр.
- Кирек мĕнле уяв кĕрекине те авалтанах сумлă хăнасем илем кỹнĕ. Пирĕн уявра камсем пуласса кĕтетĕр?
- Чăваш Республикин Пуçлăхне Михаил Игнатьева, министрсене, тĕрлĕ ведомствăсен, федераллă тата территориллĕ службăсен ертỹçисене, район администрацийĕсен пуçлăхĕсене кĕтетпĕр хăнана. "Хир кунĕ" пулнă май, ытти районсенчи ял хуçалăх пайĕсен ертỹçисем те айккинче юлмĕç. Хамăрăн паллă ентешсене те йыхравсем янă. Олимп чемпионĕ В.В.Воронков, В.А.Ильин вице-адмирал тата пирĕн тăрăхра çуралса ỹснĕ ытти паллă çынсем те çакнашкал пысăк уява килсе хисеп тăвасса шанас килет.
- Районта пурăнакансемпе хăнасене мĕн кĕтет-ха çав кун, епле культура мероприятийĕсем курса савăнма пултарĕç вĕсем? - Пĕрре те кичем пулмĕ, мĕншĕн тесен уяв программи питĕ пуян. Чăваш Ен Пуçлăхĕпе сумлă хăнасем ирех Киров поселокĕнчи фельдшерпа акушер çĕнĕ пунктне уçнă çĕре хутшăнĕç, "Уй-хир кунне" çитсе хальхи техникăпа, вĕсем агротехника ĕçĕсене пурнăçланипе паллашĕç. Пĕтĕм Раççейри "Раççей çăл куçĕсем" фестивале хутшăнакансем тĕрлĕ халăхăн юрри-ташшине кăтартĕç. Çакна та каласа хăварам. Чи аякран килнĕ артистсем Китай халăх республикин 2 ансамблĕн членĕсем пулĕç. Ял поселени-йĕсем хăна çурчĕсенче çав тăрăхсенчи йăла-йĕркепе, ĕç-хĕлпе паллаштарĕç, наци апат-çимĕçĕпе те сăйлĕç. Спорт вăййисене "Кĕтне" ФСК территорийĕнче йĕркелĕç. Унсăр пуçне, лаша спортне юратакансем "Перекресток" çумĕнчи ипподромра джигитовка, юртă лашасен чупăвне курса киленме пултарĕç. Суту-илỹ точкисем нумай пулмалла, ача-пăча валли тĕрлĕ аттракционсем ĕçлĕç. Уявăн тулли программипе ытлари кунччен пурте паллашса ĕлкĕреççĕ пуль тетĕп, çавăнпа кашни пулăм çинче чарăнса тăмăп.
- Кун пек пысăк мероприятисенче çынсен хăрушсăрлăхне мала лартмалла. Çак енĕпе те мерăсем йышăннах ĕнтĕ?
- Паллах. Уяв инкек-синкексĕр ирттĕр тесе пĕтĕм хăрушсăрлăх мерисене йышăннă. Çав кун полици ĕçченĕсем, çул-йĕр хăрушсăрлăхĕн сотрудникĕсем кунĕпех ура çинче пулĕç. Медицина бригадисем, пушар чаçĕн ĕçченĕсем хатĕрех тăрĕç. Халăхăн та хăйне йĕркеллĕ тытмалла, лайăх мар лару-тăру сиксе тухасран асăрханмалла.
- Михаил Романович, Сирĕн районта пурăнакансене чĕнсе каламалли те пур ĕнтĕ...
- Праçнике хăнасем нумай килеççĕ, вĕсем кайран тăван ялĕсене те çитсе курма кăмăл тăвĕç. Унта тирпейсĕр пулсан хамăрăн ята яни кăна. Палăртнă кун асăннă вырăнсем таса та тирпейлĕ пулччăр тесе тимлер. Пушă кĕленче, тĕрлĕ ăпăр-тапăр пăрахса хăварар мар, çынсен ĕçне хаклама пĕлер. Уяв кунĕнче вара хăнасем умĕнче хамăра культурăллă тытар. Раççейри тĕрлĕ регионтан, республикăри ытти районсенчен килнисен асĕнче ырă ятлă юлар. Уяв йĕркеллĕ иртессе, пирĕн пите хĕретмелле пулмасса шанатăп.
Пурне те Республика кунĕпе ăшшăн саламлатăп!
- Тавах калаçушăн.
Л.ШУРЯШКИНА калаçнă.
Автономное учреждение Чувашской Республики «Редакция Комсомольской районной газеты «Касал ен» («Кошелеевский край») Министерства информационной политики и массовых коммуникаций Чувашской Республики