11:10 09 июня 2014 г.
"Ачалăхшăн, ачалăх ячĕпе" ыркăмăллăх марафонĕ вăхăтĕнче кăçал 9,5 миллион тенкĕ укçа пухăннă. Тĕрĕссипе, пурте укçан хывман, урăхла майпа пулăшакан та (кам хỹтлĕх кирлĕ ачасене канма кайма путевка уйăрнă) пулнă. Çапах та маларах асăннă 9,5 миллион тенкĕрен пысăк пайне "кĕмĕлпе" уйăрнă. Пĕлтĕр ыркăмăллăх акцине хутшăннисем 8,3 миллиона яхăн тупра пухайнă.
Кăçал укçа-тенке СМС-хыпар ярса та хывмалла туса панăччĕ. Анчах техника сăлтавне пула чăрмавсем сиксе тухнă иккен. Çапла вара çĕнĕлĕхпе пин çын ытла усă курас тенĕ тĕк, 600-шĕ кăна укçа куçарайнă. Кашни çынран капла майпа пĕр 50 тенке яхăн куçнине шута илсен тупри нумаях та мар. "Мĕн чухлĕ пухăнни мар, пулăшас текенсем пурри аван", - тет ыркăмăллăх фончĕн республикăри уйрăмĕн ертỹçи Юрий Кислов. СМС-хыпар яракансен кăна мар, акцие хутшăнакансен йышĕ те кăçал ỹснĕ иккен.
Марафона вара савăнăçлă лару-тăрура Кỹкеçре хупнă. "Çулталăк меценачĕ" медальпе республикăри стоматологи поликлиникин тĕп тухтăрне Вячеслав Бычкова чысланă. Унта тăрăшакансем 321,6 пин тенкĕ куçарса панă.
Автономное учреждение Чувашской Республики «Редакция Комсомольской районной газеты «Касал ен» («Кошелеевский край») Министерства информационной политики и массовых коммуникаций Чувашской Республики