00:00 18 марта 2013 г.
«Сывлăхлă пулас килет тĕк — спортпа туслаш», — теççĕ. Сывă пурнăç йĕркине тытса пыракан çын çеç пурнăçра чăннипех те маттур, çитĕнĕвĕсем те сахал мар унăн. Районта тĕрлĕ ăмăртусем йĕркелени — спорта юратакансемшĕн чăн-чăн савăнăç. Акă иртнĕ шăмат кун, мартăн 16-мĕшĕнче, Комсомольски вăрман хĕррине спортсменсем черетлĕ тупăшăва, «Каçал ен» хаçат парнисене çĕнсе илессишĕн йĕркеленĕ ăмăртăва, пуçтарăнчĕç.
Йĕлтĕр спортне кăмăллакансене чи малтанах «Каçал ен» хаçат тĕп редакторĕ Л.Г.Шуряшкина саламласа ăнăçу сунчĕ. «Паян чи маттуррисем, хăюллисем, çирĕпписем финиша чи малтан çитсе парнеллĕ пулĕç», — терĕ Любовь Георгиевна спортсменсене хавхалантарса. Йĕлтĕрçĕсене ЧР Патшалăх Канашĕн социаллă политика тата наци ыйтăвĕсем енĕпе ĕçлекен комитечĕн председателĕ, ентеш П.С.Краснов ăшшăн саламларĕ, малашне те ÿсĕмсем тума сунчĕ. Хаçат редакцине тăрăшуллă ĕçленĕшĕн, мĕн ĕлĕкрен пыракан йăлана асра тытса, паянхи кун та çак ăмăртăва йĕркеленĕшĕн диктофон парнелесе чысларĕ.
Малалла районти тĕп шкулсенчен килнĕ вĕренекенсем старта тухрĕç. Хĕрсемпе каччăсем хĕрÿ тупăшура çĕнтерĕве алран вĕçертесшĕн пулмарĕç. Спортра вара чи вăйли çеç çĕнтерет тенешкел, финиша Хырхĕррисем чи малтан çитрĕç. Иккĕмĕшсем — Анаттимĕрчкассисем, виççĕмĕшсем Тăманлăвыçлисем пулчĕç.
Вăтам шкулсенчен Аслăчурачăксене çитекенни пулмарĕ, вĕсем — пĕрремĕш. Нĕркеçсем финиша иккĕмĕш, Аслăçĕрпÿелсем виççĕмĕш çитрĕç.
Шел те, ăмăртăва районти пур шкул команди те хутшăнмарĕ. Комсомольски 1-мĕш 2-мĕш, Урмаел, Тукай Мишер, Асанкасси, Хырай Ĕнел вăтам, Элпуç, Александровка тĕп шкулĕсен командисем ăмăртăва хутшăнма кăмăл туман, сăлтавĕ мĕнре-ши? Район шайĕнче иртекен пысăк ăмăртăва спартакиада шутне кĕмест тесе шкул ачисене явăçтарман директорсем те пур пулас. Ку йĕлтĕр спорчĕ çине алă сулни мар-и?
Кăçал организацисемпе предприятисем те сахал команда тăратнă. Старта Чĕчкен, Тукай, Комсомольски, Хырхĕрри, Шурут ял поселенийĕсен, район администрацийĕн халăха социаллă пулăшу паракан центрĕн ĕçченĕсем çеç тухрĕç. Ыттисем ăмăртăва хутшăнма вăхăт тупайман.
Кашни ушкăнри çĕнтерÿçĕсене Хисеп хучĕсемпе, парнесемпе, кубокпа чысларĕç. Пĕрремĕш вырăна тухнă командăсене редакци «Каçал ен» хаçата 2013 çулăн иккĕмĕш çур çулне тÿлевсĕр çырăнтарса парать.
Эстафетăна йĕркелесе ирттерме пулăшнă судьясене, Е.А.Тихонова, В.В.Белкова, Е.Н. Степановăна, А.И.Филиппова, спорт ветеранне В.И.Пундякова редакци коллективĕ чĕререн тав тăвать.